Íslandsvinir

Það er sem betur fer enn smá líf í umhverfisumræðunni. Mæli með að fólk lesi bækling Íslandsvina sem dreift var í hús í gær. Það er djarft framtak sem vonandi minnir fólk á marga gilda punkta varðandi skuggahliðar álframleiðslunnar sem mikið var rætt um í kjölfar Draumalandsins.

Það átta sig t.d. ekki allir á því að náttúruspjöllin sem tengjast íslensku stóriðjunni gerast ekki bara hér. Báxítvinnslan í hitabeltinu er afar umsvifamikil og umhverfisspjöllin þar gríðarleg.

Einn afar athyglisverður punktur í bæklingnum var sú staðreynd að í Sviss var síðasta álverinu lokað 2006. Þar hafa menn væntanlega áttað sig á mikilvægi hreinnar náttúru enda Sviss mikið ferðamannaland þar sem tært og hreint Alpaloftið er lykilþáttur.

Lesið bækling Íslandsvina. Hann er skemmtilega 'in your face' framsettur en innihaldið er líka mjög kröftugt og verðug áminning um í hvað áliðnaðinum felst.

Athugasemdir

[Gústaf (IP-tala skráð) 4.5.2007 kl. 11:36]

Og þú notar auðvitað engan varning af nokkru tagi sem unninn er úr áli? Sé á vefnum þínum að þú auðkennir þig með því að þú sért á leið til New York. Ætlarðu að synda þangað?

[Snorri Sigurðsson, 4.5.2007 kl. 12:26]

Já ég ætla svo sannarlega að synda. Það er ekkert mál !

Nei láttu ekki svona. Ég var ekkert að segja að það eigi að banna ál. Það er auðvitað firra. En það má alveg benda á hvað fylgir álframleiðslunni, þó ekki nema til að eitthvað aðhald sé varðandi hvernig áliðnaðurinn virkar og til að benda á að margt megi bæta. Auk þess er spurning hvort öll þessi álframleiðsla sé nauðsynleg. Við þurfum ál fyrir margt t.d. flugvélar en það er brotabrot af álinu sem er framleitt. Þurfum við allar þessar áldósir undir drykki ? Og þurfa þær allar að vera úr frumunnu áli ? Hvers vegna er ekki hægt að endurvinna meira af þeim áldósum sem til eru ? Og hvað með allt álið sem fer í gerð vopna af ýmsum gerðum. Er það verðugur málstaður ?

Svo er önnur saga hvort að Íslendingar þurfi að vera svona aktívir í álframleiðslunni. Við erum mjög langt frá uppruna hráefnisins. Flutningar þess hingað eru bæði dýrir og mengandi. Við seljum orkuna á útsöluverði eins og við séum á vonarvöl og eigum enga aðra kosti fyrir efnahag landsins. Viljum við gera Ísland að bananalýðveldi áliðnaðarins ?